Ўзбекистонда қонунчилик даражасида “Trade-Up” деб номланган янги тушунча жорий этилмоқда. У орқали ишлатилган автомобилларни алмашиш мумкин бўлади. Бу ҳақда Вазирлар Маҳкамаси қарорида қайд этилган.
Ҳужжатга кўра, автотранспорт ишлаб чиқарувчилари, дистрибьюторлар, дилерлар ҳамда дистрибьюторлик ташкилотлари дилерлари Trade-In ва Trade-Up дастурлари доирасида аввал ишлатилган автомобилларни сотиб олиш ва сотиш шартномаларини тузиш ҳуқуқига эга бўлди.
Trade-In — ишлатилган автомобилни янгига алмаштириш ва шу билан боғлиқ равишда қийматдаги фарқни тўлаш ёки олиш. Trade-Up — ишлатилган автомобилни бошқа ишлатилган автомобилга алмаштириш ва шу билан боғлиқ равишда қийматдаги фарқни тўлаш ёки олиш.
Trade-In ёки Trade-Up орқали шартнома тузилганда дистрибьюторлар ва дилерлар қуйидагиларни бажариши шарт:
- агар автомобиль оилавий мулк ҳисобланса, эр-хотиндан нотариал тасдиқланган розилик олиш;
- автомобилнинг техник ҳолати ва агрегат рақамларини ЙҲХБ органларида текширишдан ўтказиш.
Текширув якунлангач, дистрибьютор ёки дилерга вақтинчалик рўйхатдан ўтказиш ҳақида маълумотнома берилади. Бу ҳужжат автомобилни янги эгасига қайта рўйхатдан ўтказишгача сақлаш ва ташиш имконини беради.
Шу билан бирга, дистрибьютор ва дилерлар вақтинчалик рўйхатдан ўтказиш учун давлат божини тўлашдан озод қилинади.
Комментарии