Йил охиригача тунги автобус йўналишлари йўлга қўйилади

Тошкентда биринчи тунги қизил автобуслар жорий йил охиригача ишга туширилади, дея хабар қилди Замон информацион телекўрсатуви эфирида.

Автобуслар соат 22:00 дан 06:00 гача аэропорт, вокзал ва сайёҳлик кўчалари орқали 15 та йўналишда ҳаракатланади. Улар қизил рангга бўялади. Дастлабки босқичда ҳаракатланиш интервали 30 дақиқани ташкил этади.

Тошкент шаҳар транспорт ва йўл-транспорт инфратузилмасини ривожлантириш бош бошқармаси бошлиғи Аллаяр Норбўтаевнинг сўзларига кўра, лойиҳа икки босқичда амалга оширилади:

Умумий узунлиги 136 км бўлган 8 та йўналиш мавжуд. 31 та автобус ишга туширилиши режалаштирилган. Бунга 19,1 млрд сўм йўналтирилади;

Умумий узунлиги 98 км бўлган 7 та йўналишда 23 та автобус ҳаракатланади. Лойиҳани амалга ошириш учун ҳозирги босқичда 14,2 млрд сўм маблағ талаб этилади.

"Биз уларни "Т" ҳарфидан бошланадиган рақамлар билан белгилашни таклиф қилдик - Т1, Т2, Т3. Жорий йил якунига қадар Т1 йўналишини ишга туширишни режалаштирганмиз," - деди А.Норбўтаев.

Унинг сўзларига кўра, Т1 йўналиши Бектемир тумани Ҳусайн Бойқаро кўчасидан Қўйлиқ бозори томон, сўнгра ҳозирги Хонободтепа кўчаси орқали ўтади. Ушбу йўналиш жорий йил охиригача ишга туширилади.