18 август куни Навоий вилояти Нурота тумани Зафарабод шаҳарчасидан 26,7 км шимолий-ғарбда жойлашган "Темирчи" олтин конини сотиб олиш бўйича аукцион якунланди. Бу ҳақда E-auksion платформаси маълумотларида қайд этилган.
Коннинг бошланғич баҳоси 4 млрд 120 млн 412 минг сўмни ташкил этган. 12 соатдан ортиқ давом этган савдоларда 309 та таклиф берилди.
Энг юқори нархни Zauris МЧЖ таклиф қилиб, 67 млрд 780 млн 777 минг сўмга сотиб олди. Бу бошланғич баҳодан қарийб 16,5 баравар юқори.
Маълумотга кўра, Zauris МЧЖ 2025 йил 4 июлда Тошкентда рўйхатдан ўтган. Компаниянинг устав фонди 10 млн сўм бўлиб, асосий фаолият тури — рангли металллар конларини қазиб чиқариш ҳисобланади.
Компаниянинг 100% улуши Файзиева Феруза Тоҳир қизи номига расмийлаштирилган ҳамда у раҳбар сифатида кўрсатилган.
Лот ҳужжатларига кўра, кон захираси 6 тонна олтинни ташкил этади.
Комментарии