Бугун Тошкент вилоятининг Ўртачирчиқ туманидаги Мудофаа вазирлиги десантчиларни тайёрлаш марказида кенг кўламли, идоралараро ўқув машғулотлари бўлиб ўтди. Бу ҳақда Uzbekistan Airports матбуот хизмати хабар қилди.
Сценарийга кўра, йўловчи самолёти қўнишга яқинлашганда, ҳаво диспетчери ва самолёт экипажи ўртасидаги алоқа узилиб қолади. Самолёт Тошкент шаҳрига етмасдан авиаҳалокатга учрайди, натижада ёнғин чиқади, қурбонлар ва жароҳатланганлар бор. Диспетчерлар фавқулодда вазият ҳақидаги маълумотларни зудлик билан аэропортнинг авария-қутқарув хизматига узатадилар, улар эса ўз навбатида бошқа хизматларга хабар беради. Қутқарув операцияси бошланади.
Симуляция қилинган фавқулодда ҳолат оқибатларини бартараф этиш учун жами 250 га яқин киши ва идоралараро тузилмаларнинг 20 та махсус техникаси жалб қилинган. Иштирокчи ташкилотлар қаторида: Фавқулодда вазиятлар, Мудофаа, Соғлиқни сақлаш ва Ички ишлар вазирликлари, Миллий гвардия ҳамда Uzbekistan Airports. Машғулотлар доирасида қутқарувчилар ўз отрядларининг тайёргарлиги, ёнғинни ўчириш жараёнида мувофиқлаштириш, одамларни эвакуация қилиш, жабрланганларни жароҳат оғирлигига қараб тақсимлаш, биринчи тиббий ёрдам кўрсатиш ва уларни тиббиёт муассасаларига етказиш, шунингдек, самолёт бортида бўлган хавфли юкни эвакуация қилиш бўйича ишлар олиб боришди.
Машқларнинг барча босқичлари батафсил ўрганилди ва таҳлил қилинди. Манёврлар натижалари бўйича бўлимлар ва идоралар ўртасидаги ўзаро ҳамкорликни яхшилаш бўйича тавсиялар ишлаб чиқилди. Тадбир якунида “Тошкент” аэропорти ҳамда ўзаро алоқадор идораларнинг куч ва воситалари тайёргарлиги юқори баҳоланди ҳамда ҳақиқий фавқулодда ҳолат содир бўлган тақдирда тезкор чоралар кўришга тўлиқ тайёр эканлиги эътироф этилди.
Комментарии