Суд материалларига кўра, К.С. 2024 йил октябрь ойида ишлаш мақсадида Россияга кетган. Унинг айтишича, Telegram орқали ўрмон кесиш ишлари учун 150 минг рубллик иш таклифи ҳақида эълон кўрган. Медосмотрдан ўтгач, у билан меҳнат шартномаси тузилган, бироқ кейинчалик маълум бўлишича, у аслида Россия Қуролли Кучлари сафида хизмат қилиш шартномасига имзо чеккан.
2024 йил ноябрь ойида К.С. Курск вилоятининг Больше Солдатское қишлоғида фронт чизиғини қўриқлаш ишларида иштирок этган. Бу ҳудудда Россия ва Украина ўртасида жанглар кетган. Агар у жангларда қатнашишдан бош тортса, уни ҳарбий полицияга топшириб, 5 йилга қамаб қўйиш билан қўрқитишган.
Жорий йилнинг январь-февраль ойларида у Суджа шаҳри атрофидаги позицияларга озиқ-овқат етказиб бериш билан шуғулланган. Соғлиғи ёмонлашганидан сўнг, аввал госпиталга, кейин эса даволаниш учун лагерьга юборилган.
Кейинроқ фронтга қайта жўнатилишини эшитгач, К.С. Ўзбекистоннинг Россиядаги элчихонасига мурожаат қилган. Лагердан яширинча чиқиб, Москвага етиб борган ва элчихонада унга "Қайтиш гувоҳномаси" расмийлаштирилиб, Тошкентга қайтиб келган.
Суд жараёнида у ўз қилмишини тан олган, афсусланишини билдирган, қонунбузарликка нохос равишда — турмуш шароити ва ота-онасининг қарзларини тўлаш мақсадида борганини айтган. Шунингдек, у оилада ягона фарзанд эканини ва жазони енгиллаштиришни сўраган.
Зафарабод туман суди уни Ўзбекистон Жиноят кодексининг 154-моддаси 1-қисми (Ёлланмачилик) бўйича айбдор деб топди ва 4 йил муддатга озодликни чеклаш жазосини тайинлади.
Комментарии