Фотограф Евгений Чубко Чирчиқдаги экологик вазият қандай ўзгариб бораётгани ҳақида гапирди. Унинг сўзларига кўра, авваллари кристаллдай мусаффо ҳисобланган бу дарёнинг кўриниши ва ҳидидан энди жиддий хавотир уйғонади.
Унинг кузатишларига кўра, аввал ёввойи табиатдан баҳра олиб, дам олиш мумкин бўлган Чингилди атрофидаги ҳудудда кўп йиллардан бери кенглиги бир нечта метр бўлган ариқ орқали кўксиёҳ–бинафша рангдаги суюқлик дарёга оқизиб келинмоқда.
«Фожианинг кўлами айниқса сунъий йўлдош тасвирларида яққол кўринади. Мусаффо тоғ дарёси бир неча сониядаёқ қип-қизил ва қўнғир ифлос оқова ариғига айланиб қолади», — дейди фотограф.
Унинг қайд этишича, уч йил аввал оммавий ахборот воситаларидаги мақолалар ва эколог мутахассисларининг ташрифидан сўнг ҳам вазият ўзгармаган.
«Куну тун давом этаётган ифлосланиш ҳали ҳам тўхтагани йўқ. Кўп миллиардли янги қурилишлар фонида дарёнинг аҳволи янада кескин кўзга ташланади», — дейди муаллиф.
Евгений Чубко ушбу ҳолат ҳақида маълумотни кенг тарқатишга чақирмоқда. Унинг фикрича, шундагина тегишли идоралар бу муаммога эътибор қаратиб, зарур чораларни кўради.
Комментарии