Покистонда июнь ойи охиридан бери муссон ёмғири ва ёғингарчилик ҳодисалари оқибатида 279 киши ҳалок бўлди. Бу ҳақда маҳаллий Samaa TV телеканали хабар берди.
"Покистонда давом этаётган муссон ёмғирлари оқибатида ҳалок бўлганлар сони 279 кишига етди, сўнгги 24 соат ичида яна саккизта ўлим ҳолати қайд этилди," - дейилади хабарда.
Маълум қилинишича, 28 июнь куни муссон мавсуми бошланганидан бери камида 676 киши жабрланган, 1,5 мингдан ортиқ уй шикастланган. Энг кўп зарар Панжоб вилоятига етказилган, унинг ҳудудида 151 киши ҳалок бўлгани ва 536 киши жароҳатлангани тасдиқланган.
Бундан ташқари, мол-мулк ва чорва молларига катта зарар етказилган. Мамлакат бўйлаб жами 1,5 мингдан ортиқ уй-жой шикастланган, улардан 362 таси сўнгги бир кун ичида зарар кўрган. Қайд этилишича, ёмғирлар оқибатида камида 374 та ҳайвон нобуд бўлган, бу эса қишлоқ хўжалигига қарам жамоаларнинг аҳволини янада оғирлаштирган.
Маълумотларга кўра, 31 июлга қадар мамлакатнинг бир қатор ҳудудларида ёмғирнинг янги тўлқини ёғиши кутилмоқда.
Комментарии