Туркистон вилоятида Ўзбекистон ва Қозоғистон ўртасидаги чегара ҳудудида нефть маҳсулотлари контрабанда йўли билан олиб ўтилаётган навбатдаги туннель аниқланди, деб хабар бермоқда Қозоғистон Давлат органлари интернет-ресурсларининг ягона платформаси Матбуот хизмати.
Жиноий гуруҳ 450 метр узунликдаги ер ости туннелини қазиган. Улар хориждан молиялаштириш, логистика ва ёқилғи-мойлаш материалларини олиб чиқишни ўз ичига олган контрабанда схемасини йўлга қўйишди. Ноқонуний фаолият икки ой давомида амалга оширилган.
Икки давлат ҳуқуқ-тартибот идоралари томонидан ўтказилган тезкор тадбирлар давомида жиноий схеманинг барча иштирокчилари, жумладан, Ўзбекистон ва Қозоғистоннинг беш нафар фуқароси аниқланган. Ҳозирда тергов ҳаракатлари якунланиб, иш судга юборилган.
Эслатиб ўтамиз, худди шундай ҳолат жорий йил бошида ҳам аниқланган эди. Ўшанда жиноятчилар ноқонуний ер ости қувурини ташкил этиб, Қозоғистон ҳудудидан Ўзбекистонга АИ-92 маркали бензинни олиб ўтишган.
Комментарии