Санитария-эпидемиологик осойишталик ва жамоат саломатлиги қўмитаси мутахассислари томонидан ўтказилган таҳлиллар натижасига кўра, Ўзбекистонда жорий йилнинг ўтган олти ойида 23 558 ҳолатда ўткир ичак инфекцияси қайд этилган. Бу ҳақда АОКАда ўтказилган брифингда қўмита июль хизмати раҳбари Мафтуна Саидова маълум қилди.
Ҳудудлар кесимида энг кўп ҳолатлар Тошкент шаҳри, Қашқадарё, Сирдарё вилоятлари ва Қорақалпоғистон Республикасида қайд этилган.
Ёш тоифасидан энг кўп касалланганлар ёш болалар орасида:
• 1 йилгача - 5000 дан ортиқ ҳолат;
• 1-3 йил - 7678 та ҳолат;
• 4-6 ёш - 3184 та ҳолат;
• 7-14 ёш - 1998 та ҳолат;
• 15-19 ёш - 756 та ҳолат;
• 20 ёш ва ундан катталар - 4938 та ҳолат.
Мутахассислар касаллик кўпайишининг бир неча сабабларини таъкидламоқдалар, жумладан, узоқ вақт ёки нотўғри шароитда сақланган овқатларни истеъмол қилиш, ювилмаган ҳўл меваларни истеъмол қилиш, очиқ сув ҳавзаларида чўмилиш пайтида микробларнинг организмга кириши, беморлар билан алоқа қилиш ва бошқалар.
Шунингдек, сифатсиз, антисанитария шароитида тайёрланган кўча овқатлари, салқин ичимликлар, айрон ва шарбатларни истеъмол қилиш ҳам касалликларни келтириб чиқариши мумкин.
Қўмитанинг таъкидлашича, йилнинг иссиқ ойларида аҳоли, айниқса, болалар орасида ўткир ичак инфекциялари тез-тез учрайди. Бу касалликларни ҳар хил микроорганизмлар қўзғатади. Буларга қорин тифи, паратифлар, салмонеллёз, дизентерия, вирусли гепатит А, вабо ва бошқа юқумли касалликлар киради. Одатда, бу касалликларнинг қўзғатувчилари бактериялар ва вируслардир.
ЖССТ маълумотларига кўра, дунёда ҳар йили 1 миллиарддан ортиқ диарея ҳолатлари қайд этилади, улардан 5-10 миллиони ўлим билан тугайди.
Комментарии