Ўзбекистонда қоидабузар ҳайдовчиларни ҳайдовчилик гувоҳномасидан маҳрум қилиш таклиф этилди

Ички ишлар вазирлиги қоидабузар ҳайдовчиларга нисбатан жазони кучайтиришни таклиф этмоқда (манба).

Лойиҳада таъкидланишича, айрим ҳайдовчиларнинг ҳаракат қоидаларига риоя этмаслиги — хусусан, қарши йўлга чиқиши, светофорнинг тақиқловчи сигналига бўйсунмаслиги ёки белгиланган тезликдан ортиқ ҳаракатланиши — оғир оқибатли ЙТҲларнинг кўпайишига олиб келмоқда.

Шунингдек, ҳайдовчиларнинг қоидаларга бефарқ муносабати, ҳаракат маданиятига амал қилмаслиги ва бошқа йўловчиларга ҳурматсизлик кўрсатиши ҳолатлари ҳам кундан-кун ортиб бораётгани қайд этилган.

Таклифга кўра, агар ҳайдовчи бир ой ичида 10 марта қуйидаги қоидабузарликларни содир этса:

• тезликни 40 ёки 60 км/соатдан ортиқ оширса;
• тақиқловчи светофор чироғига ёки назоратчининг тақиқловчи ишорасига қарамай йўлни кесиб ўтса;
• ПЙҚга зид равишда қарши йўлга чиқса ёки бошқа йўловчиларни хавф остига қўйиб, аварияли ҳолат яратса,

у ҳолда охирги қоидабузарлик учун қўшимча тартибда 6 ойга ҳайдовчилик гувоҳномасидан маҳрум этилади.

Вазирликнинг таъкидлашича, қонуннинг қабул қилиниши ҳаракат қоидаларига қатъий риоя этилишини таъминлайди ва оғир оқибатли ЙТҲларнинг олдини олишга хизмат қилади.

Лойиҳа муҳокамаси 25 сентябргача давом этади.