Бугун, 7 ноябрь куни Буюк Британия Ўзбекистон ва Қозоғистоннинг бир нечта компаниялари киритилган санкциялар рўйхатини янгилади.
Хусусан, рўйхатга StanexGroup холдинги таркибига кирувчи Uzstanex LLP компанияси киритилди. Компания Ўзбекистон, Қозоғистон, Қирғизистон, Тожикистон ва Туркманистонда дастгоҳларни сотиш ва созлаш билан шуғулланади.
"Компания Украинани беқарорлаштириш ёки унинг ҳудудий яхлитлиги, суверенитети ёки мустақиллигига путур етказишда иштирок этган, молиявий хизматлар кўрсатган ёки Украинанинг беқарорлашувига ёки унинг ҳудудий яхлитлиги, суверенитети ёки мустақиллигига путур етказиши мумкин бўлган маблағлар, иқтисодий ресурслар, товарлар ёки технологияларни тақдим этган," - дейилади компанияни санкциялар рўйхатига киритиш учун асосномада.
Шунингдек, Буюк Британия худди шундай асос билан Қозоғистоннинг CPS Energy LLP, ТОО TawKZ ва Rabadaziya LLP каби компанияларига қарши санкциялар киритди.
Эслатиб ўтамиз, бир ҳафта олдин АҚШ ҳам Uzstanex компаниясига қарши санкциялар киритган эди. АҚШ Молия вазирлиги маълумотларига кўра, компания Европадан дастгоҳлар партияларининг номинал қабул қилувчиси бўлган, улар кейинчалик Россияга етказиб бериш учун Хитойнинг Shanghai Winsun Imp and Exp Co Ltd компаниясига юборилган.
Шунингдек, рўйхатга саноат ускуналари, автоматик бошқарув тизимлари ва электр қурилмаларини ишлаб чиқарувчи ва етказиб берувчи The Elite Investment Group ҳам киритилган. 2024 йилнинг март-май ойларида ушбу компания Россияга қарийб 190 минг долларлик маҳсулот, шу жумладан электр трансформаторларини етказиб берди. Шунингдек, етказиб бериш аввалроқ АҚШ санкциялари рўйхатига киритилган Россиянинг "GTS Grupp" МЧЖ компанияси учун амалга оширилган.