Ўзбекистон президенти Шавкат Мирзиёев Хитой Халқ Республикаси раиси Си Цзиньпинга Шанси провинциясидаги кўмир конида юз берган портлаш оқибатида кўплаб инсонлар ҳалок бўлгани ва жароҳат олгани муносабати билан ҳамдардлик билдирди. Бу ҳақда давлат раҳбари матбуот хизмати хабар берди.
Ўзбекистон Президенти ҳалок бўлганларнинг оила аъзолари ва яқинларига ҳамдардлик билдириб, жароҳат олганларнинг тез фурсатда соғайиб кетишини тилади.
Фожиа 22 май куни кечқурун Хитойнинг шимолидаги Шаньси провинциясининг Циньюань округидаги Люшэньюй кўмир конида содир бўлди. Газ портлаши оқибатида камида 90 киши ҳалок бўлди. Ҳодиса вақтида ер остида 247 киши бўлган.
Хитой давлат оммавий ахборот воситаларининг хабар беришича, қутқарув операцияси 20 соатдан ортиқ давом этмоқда, унга 750 га яқин қутқарувчи жалб қилинган. Расмийлар ҳалок бўлганлар сони ортиши мумкинлигини истисно этмаяпти, чунки баъзи кончиларнинг тақдири ҳали ҳам номаълумлигича қолмоқда.
Изоҳ