15 июль куни Бухоро вилояти Экология, атроф-муҳитни муҳофаза қилиш ва иқлим ўзгариши бошқармасининг экологик назорат инспекцияси ходимлари томонидан Пешку туманидаги “Сафрон” чўл массивида навбатдаги рейд тадбири ўтказилди. Бу ҳақда вазирлик Ахборот хизмати хабар берди.
Рейд давомида инспекторлар Хоразм вилоятида яшовчи (шахси номаълум) фуқаролар томонидан “ЗИЛ” русумли юк машинасига ноқонуний равишда сўксаўул ўсимлиги юкланиб, чўл ичида ҳаракатланаётганини аниқлашган ва “JAC” русумли хизмат автомобили орқали таъқиб бошланган.
Қарийб 110 км масофа кузатувдан сўнг юк машинаси А-380 автойўли орқали Хоразм йўналишига кирган. Ж.Тошев инспекциянинг икки ходимини — Н.Муҳаммадиев ва О.Ҳесеновни йўлдаги бошқа машиналарни кузатиш учун тушириб, ўзи таъқибни давом эттирган. Бир муддатдан сўнг “ISUZU” русумли, давлат рақами “90 X 780 XX” бўлган бошқа юк машинаси инспекция автомобили йўлини тўсиб қўйган.
Машинадан тушган бир неча номаълум шахслар қўлида биталар, темир трубалар ва арматуралар билан хизмат машинасига ҳужум қилиб, уни пучақ қилиб ташлашган ва бошлиқ Ж.Тошевни ҳақорат қилишган. Тошев воқеа жойидан чиқиб кетишга мажбур бўлган.
Бундан ташқари, ҳуқуқбузарлар бошқарма инспекция ходимлари Н.Муҳаммадиев ва О.Ҳесеновларни юз ва тана қисмларининг барча соҳасига уриб, турли хил оғир тан жароҳатлари етказишган (Н.Муҳаммадиевнинг оёғи синган). Кейин уларни юк машинасининг бортига юклаб, ўзлари билан олиб кетаётган вақтда инспекторлар ҳаракатланиб турган юк машинасининг орқа борт қисмидан ўзларини ташлаб, қочишга улгуришган.
Айни пайтда мазкур ҳолат юзасидан Хоразм вилояти Тупроққалъа тумани прокуратураси томонидан тергов ҳаракатлари бошлаб юборилган.
Изоҳ