Эслатиб ўтамиз, ЎзА нинг интернет сайтида жорий йилнинг 4 апрель куни “Ахборот сайтларидаги “Кўчирмакашлик” қачонгача давом этади..?” сарлавҳаси остида мақола чоп этилган ва унда “...“qalampir.uz” сайти ҳам мазкур материални манбасидан кўз юмган ҳолда кўчириб босган” деб кўрсатилган эди.
“MY5” телеканали ижодкорлари томонидан видео ролик тайёрланиб унга “Ёлғоннинг миси чиқди” номи берилди. Ушбу видео лавҳада 2018 йилнинг 5 апрель куни “Qalampir.uz” сайтида ““MY5” телеканалида кўрсатилган қиз ўз жонига қасд қилди” сарлавҳали хабар тарқатилгани айтилди. “Шунингдек, хабарда, кўрсатувнинг камери объективига ножўя ҳолатда тушиб қолган қизлардан бири ўз жонига қасд қилган. Қиз тинчлантириш учун истеъмол қилинадиган демидрол дори воситасидан кўп миқдорда ичган ва орадан кўп ўтмай 1-сонли шаҳар клиник шифохонасига ётқизилган” деган маълумот берилгани ҳам таъкидланган.
Бугун 6 апрель куни “Марказий студия” кўрсатуви ижодкорлари ушбу хабарни тўғри ёки нотўғри эканлигини аниқлаш учун шифохонага боришган ва у ерда сайтда тарқатилган маълумот ёлғон ахборот эканлиги аниқланган.
Воқеанинг тўлиқ тафсилотлари бугун соат 20:20да телеканал орқали кўрсатиладиган “Марказий студия” кўрсатуви орқали намойиш этилиши айтилмоқда.