Андижонда ўз укасини қасддан ўлдирган ака суд қилинди. Суд ҳукми ва фожиа тафсилотлари ҳақда UzNews.uz'га Олий Суд Матбуот хизмати маълумот берди.
Аниқланишича, Марҳамат туманида яшовчи Ф.М. ишдан чарчаб келиб, овқатланиш учун аҳолида хонага кириб, спиртлик ичимлик истеъмол қилган.
Шу пайт унинг укаси З.М. маст ҳолда онаси билан тортишиб қолган. Ф.М. эса ташқарига чиқиб, З.М.ни уйига жўнатиб юборган.
Аммо, З.М. соат 22:00 да яна қайтиб келиб, бақир-чақир қилиб, уйида турган молни сотиб юборишни айтганида, онаси шу мол билан овуниб юрганини айтишига қарамай, у билан жанжаллашган ва ойналарни синдирган.
Бундан ғазабланган Ф.М. укаси З.М. билан жанжаллашиб, уни 3-4 қўп буғдой турган жойга итариб юборган. Мувозанатни йўқотган З.М. ўша ердаги тик турган пичоққа йиқилган. Пичоқ унинг чап қўлтиқ тагига кирган.
Жабрланган З.М.ни яқинлари зудлик билан тез тиббий ёрдам бўлимига олиб боришига қарамай у шифохонада вафот этган.
Жиноят ишлари бўйича Марҳамат туман суди укасини қасддан ўлдирган Ф.М.га нисбатан ЖКнинг 97-моддаси (қасддан одам ўлдириш) 1-қисмида назарда тутилган жиноятни содир этганликда айбланиб, унга нисбатан 10 йил муддатга озодликдан маҳрум қилиш жазоси тайинланди.