25 июнь куни Чироқчи туманида 25 ёшли йигит уйи яқинида ўлдириб кетилгани ҳақида хабар бергандик.
Маълум бўлишича, қотилликни йигитнинг қўшниси — ҳомиладор Н.Ж. қилган. Аёлнинг айтишича, марҳум Ж.А. уни жинсий алоқа қилишга ундаган. Бироқ, ўз номусини ҳимоя қилган аёл ёнида бўлган ошхона пичоғи билан Ж.А.га бир маротаба зарба берган. Йигит етказилган тан жароҳати натижасида вафот этган.
Ҳолат бўйича Жиноят кодексининг 97-моддаси 1-қисми билан жиноят иши қўзғатилиб, Чироқчи туман прокуратураси томонидан тергов ҳаракатлари олиб борилган.
Вилоят прокуратураси хабарига кўра, тергов давомида марҳум Ж.А.нинг ўлими юзасидан Чироқчи тумани прокурори томонидан “Лангар” қишлоғида аҳоли ва жабрланувчилар билан учрашувлар ўтказилган. Марҳумнинг яқинлари туман прокуратурасида бир неча маротаба қабул қилиниб, уларнинг жиноятга Н.Ж.нинг акаси ва отасининг ҳам алоқаси борлиги ҳақидаги тахминлари дастлабки терговда текширилганда, ўз тасдиғини топмаган.
Тергов якунига кўра, Н.Ж.га ЖКнинг 97-моддаси 1-қисми билан айблов эълон қилиниб, 7 сентябрь куни жиноят иши суд муҳокамасига юборилган. Жиноят иши ҳозирда жиноят ишлари бўйича Чироқчи тумани судида кўрилмоқда.