Излаш
RUUZ

Спорт

Ўзбекистон сузувчилари нега Олимпиададан маҳрум қилинганини билмоқчи

Сузиш бўйича лицензион мусобақада содир бўлган вазият бўйича расмий баёнот берилди.

1011views0replies
0

Миллий олимпия қўмитаси

2021 йилнинг 21 апрелида ўтказилган сузиш бўйича лицензион Ўзбекистон очиқ чемпионатида иштирок этган ҳиндистонлик спортчи Ликит Селвараш Према турнир давомида ноҳақликка йўл қўйилгани, маҳаллий спортчиларнинг вақтлари нотўғри кўрсатилгани ҳақидаги видеомурожаатини ижтимоий тармоқларда тарқатиши ортидан бир неча ўзбекистонлик сузувчилар Токио олимпиадасидан маҳрум қилинди.
Кенг муҳокамаларга сабаб бўлган ҳолат бўйича Ўзбекистон Миллий Олимпия қўмитаси ҳолатга ўз позициясини билдирди.
Қайд этилишича, лицензион Ўзбекистон очиқ чемпионатларига Миллий Олимпия қўмитаси раҳбарияти доимий ташриф буюриб турган, ўз навбатида, МОҚ Тезкор штаб вакили Мирсардор Aлимов ҳам мусобақани мунтазам кузатиб борган.
Мусобақадан сўнг шу ернинг ўзида кичик йиғилиш ташкил этиб, тайёргарлик жараёнини янада кучайтириш, машғулотлар сифатини ошириш бўйича мутасаддиларга тегишли кўрсатмалар берилган.
Турнирлар якунлангач, Ўзбекистон сузиш федерацияси мусобақалар протоколини МОҚга тақдим қилган ва унда 5 нафар атлетимизнинг Токио-2020 нормативини бажаргани кўрсатиб ўтилган. Тақдим этилган протоколларда белгиланган қоидаларнинг бузилиши, шу жумладан, кейинчалик ҳиндистонлик сузувчи томонидан қайд этилган воқеа ҳақида маълум қилинмаган.
Шунингдек, бирор хорижий делегация томонидан, жумладан, Ҳиндистон жамоаси томонидан мазкур лицензион турнирлар бўйича шикоят ёки эътироз келиб тушмаган.
Шу билан бирга, Ўзбекистон сузиш федерациясининг маълумотига кўра, ФИНA ушбу турнирларда қайд этилган натижаларни тан олмади. Ўзбекистон сузиш федерацияси бош котиби Aлишер Ғаниевнинг сўзларига кўра, FINA бу бўйича Тошкентга расмий хат жўнатмаган. Бироқ Ўзбекистон сузиш федерацияси бир неча бор FINAга тақдим этилган маълумотларга аниқлик киритиш учун хабар йўллаган ва ҳатто бу масала бўйича Спорт арбитраж судига (CAS) мурожаат қилган.
Якунда эса халқаро ташкилот йўллаган Universal Place асосида фақатгина 2 нафар ўзбекистонлик Хуршиджон Турсунов ва Наталя Критинина Токио-2020 Олимпия ўйинларига йўлланма олишди.
Ўзбекистон Миллий Олимпия қўмитаси, шунингдек, Ўзбекистон спорт фахрийлари кенгаши расмий равишда ушбу ҳолат ҳеч қандай спорт тамойилларига мос келмаслигини ва Олимпизм қадриятларига мутлақо зид эканлигини маълум қилади. Ўз ўрнида, бошқа федерациялар ва спорт ташкилотларидан ҳам белгиланган қоидаларга қатъий риоя қилишни сўрайди.
Шундан келиб чиққан ҳолда Ўзбекистон сузиш федерацияси Президиумидан қуйидагиларни талаб қилади:
—  Юқоридаги вазиятни кўриб чиқиш, ўрганиш ҳамда унга ҳуқуқий баҳо бериш учун Туризм ва спорт вазирлиги, Миллий Олимпия қўмитаси, Ўзбекистон спорт фахрийлари кенгаши ва Ўзбекистон сузиш федерацияси мутахассисларидан иборат ишчи гуруҳ тузиш;
—  Халқаро сузиш федерациясидан лицензион мусобақада қайд этилган натижаларнинг нима сабабдан бекор қилингани ҳақидаги материалларни тақдим қилишини сўраш;
—  Федерация бош котиби Aлишер Ғаниевни вақтинча ўз лавозимидан четлатилишини.
1011views0replies
0

Изоҳлар