Бугун, 13 май куни соат 10:30 дан 11:00 гача бўлган оралиқда Тошкент метрополитенининг Чилонзор йўналиши "Буюк Ипак йўли" метро бекатидаги йўловчилар поезднинг келишини 30-40 дақиқа кутишган. Натижада метрополитенда жуда кўп одамлар йиғилиб қолган.
Вазиятдан чиқиш учун, йўловчилар "Амир Темур хиёбони" метро бекатигача ўз йўналишига тескари ҳаракатланган поездларда етказилган.
Мазкур ҳолат юзасидан “Тошкент метрополитени” УК расмий изоҳ берди.
Унга кўра, Тошкент метрополитенининг Чилонзор йўналишида техник-профилактика ишлари олиб борилиши муносабати билан соат 10:30 дан 11:00 гача поездлар айланмаси “Aмир Темур хиёбони” бекатига амалга оширилган.
Поездлар Сергели йўналишининг “5-бекат”дан “Aмир Темур хиёбони” бекатигача график асосида ҳаракатланиб, “Aмир Темур хиёбони” бекатидан “Буюк Ипак йўли” бекатигача поездлар бир томонлама ҳаракатланган.
Ҳозирда поездлар ўрнатилган тартибда ва ҳаракат жадвалига асосан ҳаракатланаётгани маълум қилинган.