Тошкент вилояти Пискент тумани ҳудудида уйсиз ҳайвонлар учун бошпана қурилади.
AKFA Group компанияси раҳбари Камрон Ғуломов маълум қилишича, айни вақтда мазкур объектни қуриш учун ер олиш билан боғлиқ барча жараёнлар якунланган ва олдиндаги уч ой ичида уйсиз ҳайвонлар учун бошпана қуриб битказилади.
⠀
“Бизнинг ташаббусимиз минглаб ғамхўр одамларнинг эътирофига сазовор бўлганидан хурсандман ва барчани қурилишнинг якуний босқичи – расмий очилишига таклиф қилишдан мамнунман.
Шуни ҳам таъкидлашни истардимки, хоҳлаган бир киши қурилиш жараёнини интернет тармоғи орқали ҳам кузатиши мумкин. Расмий манбаларимиз ва ОАВ орқали қурилиш жараёнида юз берган муҳим воқеалар тўғрисида сизни хабардор қиламиз”, дейди Камрон Ғуломов.
Лойиҳа паспортида кўрсатилишича, 1 га ерда қурилиши режалаштирилаётган мазкур бошпанада 1000 бошгача ҳайвонларни сақлаш мумкин. Объект 3 ойда қуриб битказилади ва шу орқали 70 та иш ўрни яратилади.
