Жорий йилнинг 11 январида Давлат солиқ қўмитаси раисининг “Йирик солиқ тўловчилар рўйхатига қўшимча киритиш тўғрисида”ги буйруғига мувофиқ, Ўзбекистонда йирик солиқ тўловчилар тоифасига кирувчи юридик шахслар таркиби ўзгарди.
Рўйхатга 2 та акциз маҳсулотларини ишлаб чиқарувчи, 2 та тизим корхоналари ҳамда 280 та бошқа йирик корхоналар қўшилди. Унга қадар мазкур тоифага кирувчилар сони 836 тани ташкил этган.
Жами йирик солиқ тўловчилар сони 1 120 тага етди.
Йирик солиқ тўловчилар соҳа бўйича қуйидагича кўриниш олган:
– акциз солиғига тортиладиган товарларни ишлаб чиқарувчи ва акциз тўланадиган хизмат кўрсатувчи корхоналар — 113 та;
– тижорат банклари, товар-хом ашё, фонд ва валюта биржалари — 34 та;
– “Навоий КМК” ДК, “Олмалиқ КМК” АЖ ва уларнинг таркибига кирувчи ташкилотлар — 12 та;
– маҳсулот тақсимотига оид битим бўйича ишларни бажаришда иштирок этаётган ташкилотлар (СРП) — 5 та;
– маҳсулот (товар, иш ва хизмат)ларни сотишдан олинган соф тушуми ўтган календарь йил якуни бўйича 100 миллиард сўмдан юқори бўлган ёки кетма-кет келадиган ўн икки ойлик давр якуни бўйича ушбу миқдордан ошган юридик шахслар — 742 та;
– углеводород хом ашёси ва минерал ресурсларни қазиб олувчи, қайта ишловчи, етказиб берувчи ва сотувчи ҳамда электр энергиясини ишлаб чиқарувчи ва етказиб берувчи юридик шахслар (автомобилларга ёқилғи қуйиш шохобчалари бундан мустасно) — 190 та.
– Ўзбекистон Республикасининг ҳаво бўшлиғидан йўловчиларни ташиш мақсадларида фойдаланувчи, халқаро ҳаво алоқаларини амалга оширувчи ва уларнинг таркибига кирувчи юридик шахслар — 24 тани ташкил этади.
Аввалроқ, Молия вазирлиги “2021 бюджет лойиҳаси бўйича Фуқаролар учун бюджет”ҳужжатида 20 та компания республика бюджетининг 47,3 фоизини таъминлашини маълум қилганди.