Кеча, 24 декабрь куни Россияда "Shamo Boxing" промоутерлик компанияси томонидан ташкил этилган бокс оқшомида профессионал боксда фаолиятини давом эттираётган Ҳасанбой Дўсматов ўзининг иккинчи жангини ўтказди.
Рио Олимпиадаси чемпиони профессионал боксдаги иккинчи ғалабасини қўлга киритди. У асли ўзбекистонлик бўлган, бу жангда Россия номидан рингга кўтарилган Одилжон Сотқиновни техник нокаут билан биринчи раунднинг ўзида мағлуб этди.
Жангнинг биринчи раундидаёқ Ҳасанбой рақибини тўрт марта нокдаун ҳолатига тушириб қўйди. Тўртинчи нокдаундан сўнг ҳакам жангни тўхтатди ва Дўсматовнинг муддатидан олдин ғалабасини қайд этди.
Эслатиб ўтамиз, жангда юртдошимизга дастлаб, россиялик Артём Ткаченко (5-0, 3 КО) рақиблик қилиши маълум бўлганди. Баъзи сабабларга кўра, рақиб ўзгариб, яна бир мезбон Павел Гурченко (1-0-0) билан тўқнаш келиши керак эди. Бироқ якунда Одилжон Сотқиновга қарши рингга кўтарилди.
Ҳасанбой Дўсматовнинг мураббийи Зиятдин Тайғанбоевнинг вазиятга аниқлик киритишича, боксчимизга аввалроқ, Африка қитъаси вакили рақиб бўлиши керак эди. Аммо уларда виза билан боғлиқ муаммо юзага келган. Кейинроқ Ткаченко, ундан сўнг, Павел Гурченко билан жанг қилиши лозим эди. Бироқ Гурченко вазн ўлчаш маросимидан бир кун олдин қовурғасини синдириб олган. Шу тариқа, Одилжон Сотқинов рингга чиққан.