Жорий йил декабрь ойида Қорақалпоғистон Республикаси ва Самарқанд вилоятида икки нафар фуқаро совқотиб ҳалок бўлгани ҳолати аниқланган. Улардан бири жорий йилнинг 6 декабрь куни бедарак йўқолгани учун қидирувга берилган бўлган.
“Postda” газетасининг ёзишича, бедарак йўқолгани учун қидирувга берилган 1991 йилда туғилган Н. Р.нинг ташқи кўринишидан жароҳатсиз жасади Қорақалпоғистон Республикаси Хўжайли тумани “Кулаб” овул фуқаролар йиғини ҳудудидан топилган.
У ўлимига қадар Хўжайли тумани “Саришингул” овул фуқаролар йиғини ҳудудида яшаб келган.
Худди шундай ҳолат Самарқанд вилоятининг Пахтачи туманида ҳам юз берди.
Шу йил 17 декабрдаги маълумотга кўра, “Фаровон Йўлдошобод” МФЙ ҳудудида жойлашган “Агросаноат” МЧЖга тегишли дала майдонидан Осиё миллатига мансуб, 30-35 ёшлардаги номаълум эркак кишининг ташқи кўринишидан жароҳатсиз жасади топилган.
Кўрилган чоралар натижасида жасаднинг шахси аниқланган. У Нарпай туманида яшаган, 1990 йилда туғилган Н. В. эканлиги маълум бўлган.
Ҳар иккала ҳолатда ҳам ўтказилган суд-тиббий экспертизасининг хулосасига кўра, фуқаролар “тананинг умумий совқотиши”дан ўлганлиги аниқланган.
Айни пайтда ҳар икки ҳолат юзасидан суриштирув ҳаракатлари олиб борилмоқда.