Ўзбекистон 3-босқич клиник синовлари ижобий ўтган вакцинани харид қилади.
Соғлиқни сақлаш вазирлигининг маълум қилишича, ҳозирда "COVID-19"га қарши Хитойнинг “Ayhui Zhifei Longcom Biopharmaceutical” компаниясининг вакцинаси ва Россия Федерациянинг “Спутник-V” вакцинасининг 3-босқич клиник тадқиқотлари Ўзбекистонда ҳам ўтказилиши режалаштирилмоқда.
Бунда вакциналарнинг хавфсизлик кўрсаткичларини баҳолаш, уларнинг инфекцияни олдини олишдаги самарадорлигини аниқлаш асосий вазифа қилиб белгиланган. Шунингдек, “Sinopharm group” компанияси билан ҳам ушбу йўналишда иш олиб борилмоқда.
Шунингдек, вазирлик Россия Федерациясида ишлаб чиқарилган вакцинани республикага олиб келиш ва аҳолига етказиш ваколати ягона хусусий ширкатга берилгани ҳақида ижтимоий тармоқларда тарқалган маълумотларнинг ҳақиқатга зидлигини таъкидламоқда.
“Чунки "COVID-19" инфекциясига қарши вакцина харид қилиш ва ундан фойдаланиш масалалари бутун жаҳонда бўлгани каби мамлакатимизда ҳам клиник тадқиқотларнинг 3-босқичи натижаларига кўра белгиланади.
Бирор мамлакатнинг вакцинаси ижобий кўрсаткичлар қайд этгани илмий исботлансагина, уни харид қилиш, сотиб олинган вакцинани сақлаш ва ташиш билан боғлиқ масалалар тегишли мезонлар асосида кўриб чиқилади”, дейилади вазирлик хабарида.
Бундан ташқари, ҳозирда БМТ билан ҳамкорликда COVAXга аъзо давлатлар қаторида Ўзбекистонга жаҳонда олиб борилаётган клиник тадқиқотлар асосида самараси ижобий баҳоланган коронавирусга қарши вакциналарни етказиб бериш бўйича музокаралар ҳам олиб борилаётгани маълум қилинди.