Инновацион ривожланиш вазири, биолог олим Иброҳим Aбдураҳмонов Хитой Фанлар академиясининг Микробиология институти ишлаб чиққан COVID-19’га қарши вакцинасининг 3-босқич синови Ўзбекистонда ўтказилишига оид айрим маълумотларни айтиб ўтди.
Вазирнинг қайд этишича, айни кунларда дунёда кўпгина юқори технологик вакциналарнинг қарийб ўндан ортиғи 3-босқич клиник синовлари ўтказилмоқда. 1 ва 2-босқич синовлари кам миқдордаги кўнгиллиларда синовдан ўтказилади. Унда асосан вакцинанинг хафвсизлиги, самаралилиги ва антитаначалар чиқариш қобилияти ўрганилади. 3-босқичнинг энг катта мақсади аҳоли орасида қанчалик самара беришини кенгроқ ўранишдир.
– Рекомбинант вакцинанинг Хитойдаги мингдан ортиқ кўнгиллиларида муваффақиятли синовдан ўтказилган. Энди камида 15 минг кўнгиллида 3-босқич синовларини ўтказиш режалаштирилмоқда. Шундан 5 минг кўнгиллиларни Ўзбекистондан танлаб олиб ўтказиш устида ҳамкорлик ўрнатяпмиз.
Кўнгиллиларни икки гуруҳга – 18 ёшдан 59 ёшгача ва 60 ёшдан юқори бўлган кишиларга бўлинади.
Ўзбекистонда 3-босқич синовларни ўтказишда кўнгиллилар талаб қилинади. Бу борада ҳозирча муаммо йўқ. ССВ билан ҳамкорликда биз оилавий поликлиникаларни жалб қилган ҳолда кўнгиллиларни чақиряпмиз. Бунда кўнгиллиларга шароит яратиб, олдин уларни ўқитиб, ундан кейин эмлашни амалга оширамиз, - дейди Иброҳим Aбдураҳмонов.
Қайд этилишича, клиник синовларда қатнашадиган 5 минг кишидан ярми – плацебо гуруҳи, улар ҳақиқий вакцина олмайди. Клиник синовлар қоидасига кўра, қайси кўнгиллига ҳақиқий вакцина, қайси бирига дорисиз эритма юборилиши сир тутилади.
Иброҳим Aбдураҳмонов синов учун ушбу вакцина танланганига 3та сабабни ҳам айтиб ўтди:
– вакцинанинг хавфсизлик даражаси,
– COVID-19’нинг турли штаммларига таъсир қилиши,
– ижобий натижа олинган тақдирда уни ишлаб чиқаришни йўлга қўйишнинг арзонлиги.
Вазир шунингдек, Инновацион ривожланиш вазирлигидан мустақил равишда, Соғлиқни сақлаш вазирлиги бундан бошқа яна 2 та вакцина синовларини ўтказиш масаласида Хитой ва Россия билан музокаралар олиб бораётганини ҳам маълум қилди.