Ўзкомназорат Ўзбекистон электрон оммавий ахборот воситалари миллий ассоциацияси ҳамда Навоий вилояти ҳокимлигининг расмий веб-сайтига уюштирилган ҳужумлар юзасидан муносабат билдирди.
Ўзкомназорат ушбу ҳолат инспекция ҳамда тегишли ваколатли органлар томонидан ўрганилаётгани, ўрганишлар натижасидан келиб чиқиб қонунчиликка мувофиқ ўрнатилган тартибда чоралар кўрилишини маълум қилди.
“Айни вақтда веб-сайтларнинг иш фаолияти тикланган”, дейилади инспекциянинг 30 октябрь санасидаги муносабатида.
Эслатиб ўтамиз, [email protected] электрон почта эгаси 26 октябрь куни Ўзбекистон электрон оммавий ахборот воситалари миллий ассоциациясининг сайтига, шунингдек, 28 октябр куни эса Навоий вилояти ҳокимлигининг расмий сайтига ҳужумлар уюштирган.
Ўзкомназоратнинг кечаги муносабатидан сўнг ҳам хакер naesmi.uz сайтига иккинчи марта ҳужум уюштирган ва у ерда “yaxshi amaki 2:0 naesmi.uz” ёзувини қолдириб, сайт хавфсизлигида муаммолар борлигини таъкидлаган.
Маълумот учун, компьютер ахборотидан, яъни ахборот-ҳисоблаш тизимлари, тармоқлари ва уларнинг таркибий қисмларидаги ахборотлардан қонунга хилоф равишда (рухсатсиз) фойдаланиш, БҲМнинг юз бараваригача миқдорда жаримадан бошлаб уч йилгача озодликдан маҳрум қилиш жазосигача бўлган таъсир чоралари қўлланишига сабаб бўлади.