«Ўзсаноатқурилишбанк» АТБ мижозларининг норозилиги билан боғлиқ ижтимоий тармоқларда тарқалаётган хабарларга муносабат билдирди.
Банк ижтимоий тармоқларда тарқалаётган мурожаатларни ўрганиш жараёнида баъзи тушунмовчиликлар ҳам юзага келаётганини инобатга олиш кераклигини таъкидлаган.
Қайд этилиишча, бугунги кунда «Ўзсаноатқурилишбанк» АТБ томонидан коронавирус пандемиясининг иқтисодиёт тармоқларига салбий таъсирини юмшатиш бўйича қабул қилинган Президент Фармони, Ҳукумат ва Марказий банкнинг тегишли қарорларига кўра мижозларнинг кредит ва фоизларини муддатини узайтириш юзасидан ишлар амалга оширилган.
«Жумладан, банк кредит портфелидаги жами 3 809 та тадбиркорлик субъектларининг 2,9 трлн. сўмлик муддати келадиган кредитларга қўшимча имтиёзли давр берилиб, мос муддатларга узайтирилди», дейилади «Ўзсаноатқурилишбанк» АТБ Ахборот хизмати муносабатида.
Шунингдек, пандемия чекловлари туфайли фаолияти тўхтаб қолган ва ишга тушмаган лойиҳалар (ускуналар ва ўрнатиш учун мутахассислар хориждан етиб келмаган, ишлаб чиқариш жараёни импорт қилинадиган хом ашё ва ишлаб чиқарилган тайёр маҳсулотнинг реализацияси экспортга боғлиқ лойиҳалар, туризм, мактабгача таълим, умумий ўрта таълим ва бошқа) қарздорларнинг молиявий ҳолати ёмонлашган лойиҳалар ва тўла қувватда фаолият юритмаётган молиявий қийинчиликка дуч келган 1 591 та тадбиркорлик субъектларининг жами 502 млрд. сўмлик фоиз тўловларига имтиёзли давр берилиб, кейинги даврларга узайтирилди. Бунда пандемия даврида йиғилган барча кредит фоизларини бир вақтнинг ўзида ечиб олишга йўл қўйилмаслигига алоҳида эътибор қаратилган.
Банк Ахборот хизматининг таъкидлашича, бундан ташқари, жисмоний шахслар бўйича 109,3 мингта мижознинг март-сентябрь ойларида муддати келадиган 269,7 млрд. сўмлик муддати келадиган кредитларга қўшимча имтиёзли давр берилиб, кейинги даврларга тўловлари тенг тақсимланган.
«Шуни ҳам алоҳида қайд этиш жоизки, пандемия даврида оғир шароитга тушиб қолган Банк мижозларини қўллаб-қувватлаш «Ўзсаноатқурилишбанк» АТБ Бошқаруви диққат марказидаги устувор вазифалардан бири эканини, пандемия чекловлари фаолиятига таъсири бўлиб турган субъектлар бўйича мижозбай ишлаш йўлга қўйилганини эслатиб ўтамиз.
Мазкур масала бўйича кредит ажратилган филиалга ёки Бош банкка мурожаат қилишингиз мумкин», дейилади «Ўзсаноатқурилишбанк» АТБ Ахборот хизматининг расмий муносабатида.
Эслатиб ўтамиз, бугун, 27 октябрь куни ижтимоий тармоқда «Ўзсаноатқурилишбанк» АТБ мижозлари бўлган тадбиркорлардан пандемия даврида йиғилган барча кредит фоизларини ечиб олгани ҳамда уларнинг ҳисоблари музлатилгани ҳақида хабарлар тарқалган эди.