Давлат статистика қўмитаси маълумотларига кўра, туризм ва транспорт соҳалари мамлакат иқтисодиётининг пандемиядан энг кўп зарар кўрган тармоқлари бўлиб қолмоқда. Жорий йил январь-сентябрь ойларида юк айланмасининг умумий ҳажми 6,7 фоизга, йўловчи айланмаси эса 16,3 фоизга қисқарган. Туризм соҳасида – Ўзбекистонга келган чет эл фуқаролари сони 72,6 фоизга камайган.
Жумладан, 2020 йилнинг январь-сентябрь ойларида Ўзбекистонга туристик мақсадларда келган чет эл фуқаролари сони 1354,3 минг кишини ташкил этган. Бу кўрсаткич 2019 йилнинг шу даврига нисбатан 72,6 фоизга камайган. 2020 йилнинг январь-сентябрь ойларида МДҲ давлатларидан Ўзбекистон Республикасига келган чет эл фуқаролари 1295,1 минг кишини ташкил этган бўлиб, бу жами ташриф буюрганларнинг 95,6 % ини ташкил этади, бошқа давлатлардан эса 59,2 минг киши (ёки 4,4 %) келган.
2020 йилнинг январь-сентябрь ойларида туристик мақсадларда чет элга кетган Ўзбекистон Республикаси фуқаролари сони 1639,4 минг кишини ташкил этди. Ўтган йилнинг шу даврига нисбатан таққосланганда эса бу кўрсаткич 73,5 % га камайган. 2020 йилнинг январь-сентябрь ойларида МДҲ давлатларига кетган Ўзбекистон Республикаси фуқаролари 1525,3 минг кишини ташкил этган бўлиб, бу жами кетганларнинг 93,0 % ини ташкил этади, бошқа давлатларга эса 114,1 минг киши (ёки 7,0 %) кетган.
Ўзбекистон Республикасига келган чет эл фуқаролари сонининг таҳлилидан кўринадики, 2020 йилнинг январь-сентябрь ойларида ўтган йилнинг шу даврига нисбатан 3584,2 минг нафар кам чет эл фуқаролари ташриф буюрган. Чет элга кетган Ўзбекистон Республикаси фуқаролари сони, 2019 йилнинг январь-сентябрь ойларида жами 6195,3 минг кишини ташкил этган бўлса, 2020 йилнинг мос даврида эса 1639,4 минг нафарни ташкил этди.
2020 йилнинг январь-сентябрь ойларида Ўзбекистон Республикасига келган чет эл фуқароларининг 50,8 % ини (687,5 минг киши) эркаклар, 49,2 % ини (666,8 минг киши) аёллар ташкил этган.
Шунингдек, туристик мақсадларда чет элга кетган Ўзбекистон фуқароларининг 54,6 фоизини (894,7 минг киши) эркаклар, 45,4 % ини (744,7 минг киши) аёллар ташкил этади.
Ўзбекистонга келган чет эл фуқароларининг асосий қисми Қирғиз Республикасидан 424,8 минг киши (барча ташриф буюрганларнинг 31,4 % и), хорижий давлатлардан Ўзбекистонга келган чет эл фуқароларининг асосий қисми эса Туркиядан 15,2 минг киши (1,1 %) ташриф буюрган.
Чет элга кетган Ўзбекистон Республикаси фуқароларининг асосий қисми, яъни 42,7 % и Қирғиз Республикасига (700,3 минг киши) боришган.