“Тошшаҳартрансхизмат” АЖ жамоат транспортларида тарқатилаётган тиббий қўлқоплар учун қанча харажат қилаётганини маълум қилди.
19 октябрдан бошлаб жамоат транспортида тиббий ниқоблардан ташқари, тиббий қўлқоп ёки бир марталик қўлқопларсиз ҳаракатланиш тақиқланиши ва бир марталик қўлқоплар йўловчиларга бепул тақдим этилиши ҳақида хабар бергандик.
Жамоат транспортларида йўловчиларни бепул қўлқоплар билан таъминлаш мақсадида “Тошшаҳартрансхизмат” АЖ, “POLIPLAST DIZAYN” МЧЖ ҳамда “BIZNES TECH MIR” МЧЖ корхоналари билан бир марталик қўлқопларни харид қилиш бўйича музокаралар олиб борган.
Музокаралар натижасига кўра;
“POLIPLAST DIZAYN” МЧЖ бир жуфт қўлқопни - 56 сўм.
“BIZNES TECH MIR” МЧЖ бир жуфт қўлқопни – 70 сўмдан
тақдим этиши маълум бўлган.
Қайд этилишича, “Тошшаҳартрансхизмат” АЖ юқоридаги икки корхонадан энг маъқули “POLIPLAST DIZAYN” МЧЖ деб топиб, у билан шартнома имзолаган.
Ҳозирги вақтда “Тошшаҳартрансхизмат” АЖ автобусларга бир кунда 300 минг дона бир марталик қўлқоплар тарқатаётганини маълум қилди.
Бир кунда 16 миллион 800 минг сўмлик маҳсулот "POLIPLAST DIZAYN" МЧЖ корхонасидан харид қилинмоқда.
АЖ қўлқопларнинг кунлик ҳажмини янада кўпайтириш мақсадида бир марталик қўлқоплар ишлаб чиқарувчи тадбиркор ва ишбилармонларни янада қулай таклифлар бўйича ҳамкорликка чақирган.