Тадбирда Ўзбекистон президенти Шавкат Мирзиёев иштирок этмоқда. Бу ҳақда президент матбуот хизмати хабар берди.
Оқсоқоллар кенгашининг қарорига мувофиқ, Жўқорғи Кенгес раиси лавозимига Камалов Мурат Қаллибекович номзоди тавсия этилган.
«Президент Мурат Камаловнинг инсоний фазилатлари, фидойилиги ва раҳбарлик қобилиятини ҳисобга олиб, унинг номзодига ўз розилигини билдирди», - дейилади хабарда.
Жўқорғи Кенгес депутатлари, жамоатчилик вакиллари сўзга чиқиб, номзодни қўллаб-қувватлади. Яширин овоз бериш йўли билан Қорақалпоғистон Жўқорғи Кенгеси раиси лавозимига Мурат Камалов сайланди.
Қайд этилишича, Жўқорғи Кенгес раиси айни орган томонидан Ўзбекистон президентининг розилиги билан ҳамда Қорақалпоғистон Жўқорғи Кенгесининг депутатлари орасидан яширин овоз бериш йўли билан Жўқорғи Кенгеснинг ваколати муддатига сайланади.