Россия тўғридан тўғри инвестициялар фонди ва "Laxisam" компанияси коронавирусга қарши 35 миллион дозагача вакцинани Ўзбекистонга етказиб бериш бўйича келишувга эришган. Бу ҳақда Ташқи меҳнат миграцияси агентлигининг расмий Telegram-каналида маълум қилинди.
Хабар берилишича, 2020 йилда 10 миллион доза, 2021 йилда эса яна 25 миллион доза вакцина етказиб бериш режалаштирилмоқда. Мазкур вакцина клиник тадқиқотлар натижаларига кўра, коронавирусга қарши ўзининг самарадорлиги ва хавфсизлигини исботлаган.
Ҳозирги вақтда Россия тўғридан тўғри инвестициялар фондига МДҲ, Европа, Осиё, Яқин Шарқ ва Лотин Aмерикасининг 50 дан ортиқ мамлакатларидан 2020-2021 йиллар учун 1,2 миллиард дозадан ортиқ вакцинага буюртмалар келиб тушган.