9 сентябрь куни соат тахминан 18:30да Жиззах вилояти ҳудудидан ўтган М-39 автомобиль йўли «Тошкент-Самарқанд» йўналишининг 997 километрида ЙТҲ содир бўлди. Бу ҳақда ИИВ ҳузуридаги тергов департаменти хабар бермоқда.
Lacetti катта тезликда кетаётганида, бошқа бир Lacetti автомобилининг чап ён томонига урилиб, йўлни бўлиб турган бетон тўсиқни бузиб ўтган ва қарама-қарши йўналишда кетаётган Kia юк машинаси билан тўқнашган.
Оқибатда катта тезликда ҳаракатланган Lacetti’да ёнғин келиб чиққан. Машинада бўлган ҳайдовчи ва бир нафар йўловчи ҳодиса жойда вафот этган, қолган 3 нафар йўловчилар касалхонага ётқизилган.
Иккинчи Lacetti йўл четида ағдарилиб кетган, машинада бўлган ҳайдовчи ва йўловчи тан жароҳатлари олмаган. Kia юк машинаси ҳайдовчиси ҳам тан жароҳатлари олмаган.
«Ҳодиса жойида тергов-тезкор гуруҳи ишламоқда. Ҳодиса юзасидан қўшимча маълумот берилади», дейилади хабарда.