«Миллий тикланиш» партияси раиси Алишер Қодиров хориждаги ўзбекистонликларни ватанга қайтармасликни тавсия қилди.
«Вирусларни аниқлаш ва улар билан курашишда Исроил давлатидаги тажриба ўргангулик. Улар 2020 йилнинг 1 сентябригача барча кирувчилар учун чегараларини ёпди. Нимага? Чунки ичкарига кирган ҳар бир инсон вируснинг янги, бораётган жойидаги муҳитга мослашмаган турини олиб кириши мумкин. Бу янги тўлқин дегани.
Пайғамбаримиз ҳам «Вабо тарқалган жойга борманг, агар турган жойингизда вабо бўлса у ердан кетманг», деб бекорга айтмаганлар.
Хориждан ватандошларни олиб келишни тўхтатиш, уларни турган мамлакатларида даволанишларини молиялаштириш ҳақида ўйлашимиз керак. Бу биринчи навбатда ўша ватандошнинг қариндошларига, қолаверса бутун Ўзбекистонга яхшилик бўлади.
Яна бир янги штамм халқимиз учун жуда оғир бўлади», - деб ёзган Алишер Қодиров ўзининг Telegram-каналида.