Тошкент шаҳар ҳокимлиги хабарига кўра, 4 июнь куни соат 11:00 дан Нурафшон ва Себзор кўчалари кесишмасидан Аҳмад Дониш ва Янги шаҳар кўчалари кесишмасигача (Mega Planet савдо марказигача) бўлган автомобиль йўлида капитал таъмирлаш ишлари бошланади.
Шунингдек, Аҳмад Дониш ва Боғиравон 2-тор кўчаси кесишмасидан Mega Planet савдо мажмуаси оралиғида жойлашган кўприкларда ҳам реконструкция ишлари олиб борилади.
Шу муносабат билан ТХАЙ устидан ўтувчи автомобиль кўпригининг маълум қисми (уч қаторли ҳаракатланиш йўлининг иккитаси) автомобиллар ҳаракати учун вақтинча ёпилади.
"Ҳайдовчиларга юзага келиши мумкин бўлган тирбандликларнинг олдини олиш мақсадида айланма йўллардан фойдаланишларини тавсия этамиз", - деб огоҳлантиради пойтахтимиз ҳокимияти.
Тошкент шаҳар ҳокимлиги келтирилган ноқулайликлар учун узр сўрайди.