7 январь куни соат 16:20 атрофида “Amirsoy Resort” тоғ-чанғи трассасини ёпишдан олдин, меҳмонларнинг бири курорт ходимига ёш чанғичи йўқолиб қолганлиги ҳақида хабар берган.
Ушбу маълумотдан сўнг, қутқарувчилар жамоаси зудлик билан йўқолган шахсни излашга киришган. Бу ҳақда курортнинг расмий Telegram-каналида хабар берилмоқда.
“30 дақиқадан кейин чанғичи қутқарувчи томонидан тоғ-чанғи трассаси ташқарисидан ҳаёт белгиларисиз топилди. 50 дақиқа давомида “Amirsoy Resort”нинг 8 нафар қутқарувчиси ва иккита шифокорлар жабрланувчини жонлантиришга ҳаракат қилишди, аммо бунинг фойдаси бўлмади“, — дейилади хабарда.
“Amirsoy Resort” барча ходимлар номидан ҳалок бўлган кишининг яқинлари ва дўстларига ҳамдардлик билдирган.