25 декабрь куни коррупцияга қарши курашиш бўйича республика идоралараро комиссияси йиғилишида соғликни сақлаш тизимида йўл қўйилаётган хато ва камчиликлар қаторида суяги синган одамларга қурилиш гипсларидан ишлатганлик масаласи ҳам кўриб чиқилган.
Маълумки, суяк синиши ҳолатларида жорий этилган стандартларга мувофиқ тиббиёт гипсидан фойдаланиш зарур.
Прокуратура сўнгги икки йилда 277 мингта ҳолатда гипс қилиш учун тиббиёт гипсининг ўрнига 351 тонна қурилиш гипсидан фойдаланилганини маълум қилди. Хусусан, Фарғонада 30, Бухорода 33, Тошкент вилоятида 35, Наманганда 36, Қашқадарёда 38, Самарқандда 43 ва Тошкент шаҳрида 48 тонна қурилиш гипсидан фойдаланилган.
Йиғилишда нима учун бундай ҳолатга йўл қўйилгани сўралганда мутасаддилар Ўзбекистонда тиббиёт гипси ишлаб чиқарилмаслигини айтишган.
“Қурилиш гипсини қўллаш беморларда жароҳат олган суякнинг силжиши, гипс қўйилган соҳа терисининг шилиниши, тери аллергияси каби салбий оқибатларни келтириб чиқаради“, — деган Бош прокурор Ниғматилла Йўлдошев.