Олий Мажлис Сенати Кенгашининг 24 декабрь куни бўлиб ўтган мажлисида Марказий банк бошқаруви таркибига киритилган ўзгаришларни тасдиқланди, деб хабар бермоқда МБ матбуот хизмати.
Олий Мажлис Сенати Кенгаши қарорига кўра, Марказий банкнинг ижро аппарати раҳбари Олимжон Эрназаров ва кредит ташкилотлари пруденциал назорати департаменти директори Аброрхўжа Турдиалиев Марказий банк бошқаруви таркибидан чиқарилган.
Шунингдек, йиғилишда Ўзбекистон Марказий банки бошқарувининг мустақил аъзолари тасдиқланган: президент ҳузуридаги давлат хизматини ривожлантириш агентлиги қошидаги мутахассисларни хорижда тайёрлаш ва ватандошлар билан мулоқот қилиш бўйича “Эл-юрт умиди“ жамғармаси директори в.б., и.ф.д., профессор Адҳам Бекмуродов ва Тошкент шаҳридаги Вестминстер университетининг амалий иқтисод бўйича магистратура курси раҳбари, фалсафа доктори Зиёдулло Парпиев.