Вазирликнинг хабар беришича, 1 август куни соат тахминан 17:00да Республика шошилинч тиббий ёрдам илмий маркази Самарқанд филиали қабул бўлимига 14 ёшли А.И. йўл машинасида олиб келинган. Қариндошларининг айтишича, А.И. бозорда стулга ўтирган вақти бирданига ҳушидан кетган ва йиқилган.
Филиал қабул бўлимида А.И. кўрикдан ўтказилганда у биологик ўлим ҳолатидалиги аниқланган. Шунга қарамай шифокорлар юрак ташқи массажини амалга оширишган, махсус қопча орқали нафас берилиб, стандартлар асосида тиббий муолажалар тезкорлик билан кўрсатилган.
"А.И.нинг қариндошларига биологик ўлим мавжудлиги, қилинаётган реанимацион чора-тадбирлар самарасизлиги ҳақида бир неча бор айтилишига қарамасдан, улар қабул бўлими врачларини ҳақоратлаб, тазйиқ остида реанимацион чоралар курсатишни давом этиришга мажбурлашган", - дейилади хабарда.
Хабарда ижтимоий тармоқларда тарқатилаётган видеолавҳа марҳум келтирилгандан кейин 30 дақиқа ўтиб олинган тасвирлар бўлиб, барча кўрсатилаётган ёрдам мурда қариндошлари тазйиқи ва босими остида бажарилгани айтиб ўтилган. Сўнгра мурда ички ишлар ходимларига топширилиб, суд-тиббий экспертиза бюросига ўтказилган.
"Иш вақтида ҳеч қайси тиббиёт ходими спиртли ичимлик истеъмол қилмаган, – деган филиал директори Акбар Тиляков. – Ижтимоий тармоқлардаги “врачлар спиртли ичимлик ичган ҳолатда ёрдам кўрсатаяпти” деган иддаолар ёлғон ва туҳмат бўлиб, агар врачлар хақиқатдан ҳам ушбу ҳолатда спиртли ичимлик ичиб, ёрдам кўрсатаётган бўлганида марҳумнинг қариндошлари у ердаги шифокорларни уша вақтдаёқ тинч қуйишмаган бўлишарди".
Соғлиқни сақлаш вазирлиги ҳуқуқни муҳофаза қилиш органларидан ушбу ҳолат юзасидан, яъни ижтимоий тармоқларда ёлғон видеолавҳа тарқатиб, халқда тиббиёт ходимларига нисбатан ишончсизлик уйғотишга ҳаракат қилаётган фуқароларга нисбатан қонунда белгиганган тартибда ҳуқуқий чоралар кўришларини сўраган.