Александр Лукашенко таклифига биноан 31 июл куни Шавкат Мирзиёев «Заславль» давлат қароргоҳига ташриф буюрди. Бу ҳақда Беларусь Президенти матбуот хизмати хабар бермоқда.
Давлат раҳбарлари қароргоҳ ҳудудида сайр қилишган, сўнгра бир-бирларига ҳадялар улашишган.
Александр Лукашенко Шавкат Мирзиёевга «Беларус» панноси ва миллий каштадўзлик намунасини совға қилган, унинг кенжа ўғли Николай эса Ўзбекистон Президентига зубр ҳайкалчасини ҳадя қилган. Шавкат Мирзиёев, ўз навбатида, Беларусь давлат раҳбарига хоккейчи ҳайкалчасини совға қилган.
Президентлар, шунингдек, норасмий ҳолатда мулоқот қилишган. Хабар берилишича, учрашув жойи сифатида Шавкат Мирзиёев ўтган йили Александр Лукашенко Ўзбекистонга давлат ташрифи билан келганида ҳадя қилган шийпонча танланган.