27 июнь куни соат 20:41да Ўзбекистон ФВВ ЁХХ тезкор рақамига Олмазор тумани Қорақамиш-1 кўчасида жойлашган «Шаббода» кафесида ёнғин содир бўлаётгани ҳақида хабар келиб тушган. Бу ҳақда Тошкент шаҳар ИИББнинг ахборот маркази хабар бермоқда.
Ёнғин жойига 8та ёнғин ўчириш техникаси жалб қилиниб, соат 20:18да ёнғин тўлиқ ўчирилган. Кафенинг 350 квадрат метр ички ва том қисми ёниб кетган. Ҳалок бўлган ва жабрланганлар йўқ.
Дастлабки маълумотларга кўра, ёнғин оловдан эҳтиётсизлик билан фойдаланиш оқибатида содир бўлган. Ёнғиндан келтирилган зарар миқдори аниқланмоқда.
Иккинчи ёнғин эса соат 21:25 да Яшнобод тумани С.Машхадий кўчасидаги «У Аркадия» кафесида содир бўлган. Ёнғин жойига ёнғин-қутқарув бўлинмалари етиб бориб, соат 21:55да ёнғин тўлиқ ўчирилган. Ҳалок бўлган ва жабрланганлар йўқ.
Ёнғиндан кафенинг 40 метр квадрат майдони ва том қурилиш қисмига зарар етказган. Ёнғин электр симларни қисқа туташуви оқибатида содир бўлган, деб тахмин қилинмоқда. Ёнғиндан келтирилган зарар миқдори аниқланмоқда.