Излаш
RUUZ

Сиёсат

Шавкат Мирзиёев Канадага боради

Ушбу масала Жавлон Ваҳобовнинг Канада генерал-губернаторига ишонч ёрлиқларини топшириш маросимида таъкидланди.

5206views0replies
0

president.uz

Ўзбекистоннинг АҚШдаги элчиси Жавлон Ваҳобов Канада генерал-губернатори Жюли Пайеттга ишонч ёрлиқларини топширди. Бу ҳақда Ташқи ишлар вазирлиги матбуот хизмати хабар берди.
Генерал-губернаторнинг расмий қароргоҳидаги маросимдан сўнг бўлган учрашув чоғида Канада раҳбари Ўзбекистон «ўзининг буюк тарихи ва дунёнинг ўта муҳим қисмидаги стратегик жойлашуви билан» машҳур деб эътироф этди.
Бундан ташқари, аввал машҳур астронавт бўлган генерал-губернатор «ўзбек фани ноёб илмий ишланмаларни таклиф этиш ва уларнинг асосида космик аппарат қурилмалари ва уларнинг компонентларини ишлаб чиқишни ташкиллаштириш орқали космосни ўрганиш дастурларига салмоқли ҳисса қўшганини» таъкидлади.
Жюли Пайетт астронавт бўлган пайтларида Ўзбекистон ҳақида кўп ўқиган ва эшитганини қайд этиб ўтган. У Самарқанднинг буюк ҳукмдори ва таниқли олим, осмон юлдузларининг энг тўлиқ ва аниқ бўлган каталогларидан бири – «Зижи жадиди Курагоний»нинг муаллифи, «Галилео Галилейнинг телескопни кашф қилишидан 150 йил олдин бутун бошли расадхона бунёд этиб, Борлиқ эшикларини ошиб берган» Мирзо Улуғбек фаолияти билан танишлигини айтиб ўтган.
Канада генерал-губернатори икки мамлакат ўртасидаги муносабатларнинг жорий даражаси ҳам кўтарилиб бораётганини эътироф этган. Ўзбекистоннинг янада ривожланган дунё ҳамжамиятининг асосий аъзоларидан бири бўлиш борасидаги интилишларини Канада томони қўллаб-қувватлаши таъкидланган.
«Мен Канада компанияси «Sky Power»нинг қайта тикланувчи энергетика соҳасига катта миқдордаги инвестиция таклифи билан Ўзбекистон бозорига кириб борганини эшитишдан бағоят хурсанд бўлдим», – деган у. Унинг фикрича, мазкур лойиҳа «ўзаро манфаатли ва икки томонга ҳам фойдали» ҳисобланади.
Шу билан бирга, у Ўзбекистон ва Канада ўртасида «ҳали бажариш керак бўлган ишлар» мавжудлигини таъкидлаган. Жумладан, у давлатлар ўртасидаги савдо ҳажмини кўпайтириш ҳамда таълим соҳасидаги ҳамкорликни фаоллаштириш зарурлигига тўхталиб ўтган.
Маросим якунида янги тайинланган элчининг Қутболди минтақалари, Шарқий Европа ва Евросиё масалалари бўйича ТИВ Бюроси директори Эллисон ЛеКлер билан учрашуви ҳам бўлиб ўтган.
Канадалик дипломат 2019 йилнинг биринчи ярмида Ўзбекистон раҳбарининг Канадага ташрифини ташкил этиш бўйича комплекс сиёсий-дипломатик чора-тадбирларни амалга оширишга тайёрлигини билдирган.
5206views0replies
0

Изоҳлар