Футбол Федерацияси – FIFA терма жамоаларнинг октябрь-ноябрь ойлари учун янги рейтингини эълон қилди.
Терма жамоалар рейтингини Европа вакили бошқариб бормоқда. Бельгия гегемонияси ҳали давом этадиган кўринади. Умумий рейтингда 1733 очко билан етакчилик қилаётган “қизил шайтонлар”, амалдаги жаҳон чемпиони Франциядан бир очко олдинда боришмоқда. Французлар ҳисобида 1732 очко мавжуд.Учинчи ўринда бораётган Бразилия терма жамоаси 1669 очко бўлса, жаҳон чемпионати финалчиси Хорватияда 1635 очко бор. Кучли ўнталикдан Англия (1619) ҳамда Уругвай (1617) ўрин алмашишган. Улар мос равишда 5 ва 6 ўринда боришмоқда. Кейинги ўринларда Португалия (1616), Швейцария (1598), Испания (1594) ҳамда Дания (1584) терма жамоалари жой олишган.
2014 йилги мундиал финалчилари Аргентина ҳамда Германия термалари янада пастлашиб, Аргентина 1573 очко билан 12, Германия эса 1555 очко билан 14 ўринда қайд этилган.
Осиё қитъаси вакиллари орасида одатдагидек, энг юқори ўринда Эрон термаси қайд этилган. Форслар умумий жадвалда 1478 очко билан 30 ўринда боришмоқда. Ундан кейинги Осиё вакили Австралия 1432 очко билан бир поғона юқорилаб 42, учинчи ўриндаги Япония термаси эса 1409 очко билан бирданига 4 ўринга юқорилаб 50 ўринда қайд этилган.
ЎзА берган хабарга кўра, Эктор Купер бошчилигида охирги икки учрашувда ( Ўзбекистон – КХДР – 2:0, Ўзбекистон – Қатар – 2:0) ғалаба қозонган мамлакатимиз термаси рейтингда 1254 очко билан икки ўрин юқорига - 94 ўринга кўтарилган.
Бу Осиё термалари орасида 13 ўрин демакдир. Қўшниларимиз Қирғизистон термаси умумий рейтингда 1268 очко билан 90, Осиёда эса 12 ўриндан жой олган. Ўзбекистондан кейинги ўринда, умумий рейтингда Фарер ороллари термаси 1251 очко билан 95 ўринда кетаётган бўлса, Осиёда Қатар миллий термаси бормоқда. 96 ўринда қайд этилган араблар ҳисобида 1244 очко мавжуд.
Эслатиб ўтамиз, терма жамоаларнинг навбатдаги рейтинги 29 ноябрда эълон қилиниши режалаштирилган.