Бош прокуратура Матбуот хизматининг маълум қилишича, 5 май куни соат тахминан 10:00 ларда Тошкент тумани Чинор 7-тор кўчасида яшовчи 1955 йилда туғилган аёл 1985 йилда туғилган келини билан ўзаро оилавий келишмовчилик сабабли жанжаллашган.
Жанжал давомида аёл ошхона пичоғи билан келинининг чап кўкрак қисмига бир маротаба зарба берган.
Олган тан жароҳати туфайли келин шифохонага ётқизилган. Шифокорлар томонидан кўрсатилган зарур тиббий муолажаларга қарамасдан 9 май куни келин шифохонада вафот этган.
Қайд этилишича, келиннинг 3 нафар фарзанди бўлган.
Мазкур ҳолат юзасидан ЖКнинг 104-моддаси (қасддан баданга оғир шикаст етказиш) билан жиноят иши қўзғатилган. Айбланувчи аёлга нисбатан "қамоққа олиш" эҳтиёт чораси қўлланилган. Тошкент тумани ИИБ ТБ томонидан тергов ҳаракатлари олиб борилмоқда.