Табиийки, бу баёнотга нисбатан жамоатчилик ўз муносабатини билдирди. Ижтимоий тармоқларда кенг муҳокама қилинди.
Шундан сўнг, 1 август куни “Ўзавтосаноат“ акциядорлик жамияти ўз сайтида “GM Uzbekistan“ автомобилларининг нархлари оширилмаслиги ҳақидаги қўшимча баёнот билан чиққанди.
Тўғри, 1 августдан нархлар расман ошмади. Бироқ жамоатчилик томонидан “Автосалонларда шартномалар нима учун берилмаяпти?”, мазмунидаги эътирозлар кўпайди. Ҳақиқатан ҳам ҳеч бир сабабсиз, халққа маълум қилиниши керак бўлган тартиблар тушунтирилмай шартномалар нима учундир тўхтатилган.
Кузатувларимиз шу кунларда машина бозорларидаги автомобилларнинг нархи ўсганлигини тасдиқлайди. Сабаб маълум, кўпчиликнинг кўнглида енгил автомобиларнинг нарх-навоси борасида шубҳалар ортиб бормоқда.
Масалага ойдинлик киритиш мақсадида “Ўзавтосаноат“ акциядорлик жамиятининг ахборот хизмати билан боғландик. Унинг раҳбари бизга қуйидаги жавобни берди.
– “GM Uzbekistan” заводи автомобилларининг нархи ўзгаргани йўқ. 30 июль куни Халқаро пресс-клубда муҳокама қилинган автомобиль нархлари масаласи ҳозирда мутасадди ташкилотлар ва мутахассислар билан ҳамкорликда ҳар томонлама, нарх ошишининг ижобий ва салбий томонларини инобатга олган ҳолда ўрганиб чиқилмоқда. Нархлар ошиши кутилмоқда, шунинг учун аниқ нарх-наволар белгиланмагани сабаб мижозлар билан шартномалар тузиш ҳозирча тўхтатилган.
Шунингдек, ижтимоий тармоқларда автомобиль нархлари бўйича тарқалган маълумотлар ва автомобиллар нархи бўйича прайс-лист ишончли эмаслигини билдирамиз. Айни вақтда уларнинг нархи ҳали ҳисоблаб чиқилмади.
Бу сўзлардан англаш мумкинки, демак, автомобилларнинг русумларига кўра нарх белгилаш жараёни кўриб чиқилмоқда.
ЎзАнинг хабар беришича, яқин кунларда нархлар борасида аниқ маълумотларни тақдим этишса, ажаб эмас.